Ezio Borbey - Por la fétha de la libèracion 2018

En patoués Valdotein

Oueu l’iye la fìta de la libérachoun , pouchèn fìye fìta gramaci a de dzì que l’àn beuttou dessi lo plat di dèsteun belle leur vìya. Eunsouégnèn-nò de seutta bagua.!!!!... Nò que n’èn eun cèrtèn éyadzo n’èn prèi cognissanse que totte l’àt eun prì..... Tzèrtzèn de fìye aprènde a noutre dzouvènno que se oueu pochoun dìye e fìye sènque voullioun, dedeun de limite, l’èt pe lo prì que l’àn payà sisse maquis.... L’ìstouéa iteudzaye a l’icoula, l’àt fino crèye que seutte dzì l’ìyàn tcheut de rodzo de comuniste, l’èt pà vrèì !!!! La leutta countre lo nazifascisme l’ìre dì pèrsonne couradjeuse , di pèrsonne que l’ayavoun lo coradzo de avèitcì pì llouèn de la pourta di mitcho, de pèrsonne que l’àn aveu lo coradzo de pà se lèichì soumèttre....A.seutte pèrsonne se pouchoun pà balli de coleur sàrìye limitatif. Seutte pèrsonne avoui lo queur eun màn , lo feusì dessì l’ìpàla l’àn quieuttò leur fameullie , leur travallie pe caque tzousa de pì grou de pì eumpourtànt. Seutte pèrsonne, ou bièn quase totte, a la feun soun reuteurià-se eun tcì leur sènsa prétènde rèn.....Pe seutte pèrsonne me sèntéiso de eurlì vive la résistance ....et foua le naziste.....e djamì pì le fascisme. !!!!....

Le mémo tèxte en Ortogrâfa de Rèfèrence B (ORB)
 ORBisâ de Dzakye
 Notes por que tués compregnéssont

Hué l’ére la fétha de la libèracion, possens
fére fétha grand mèrci a de gents que l’ant betâ
dessus lo plat du dèstin bèle (1) leur via.
Ensovegnens-nos de ceta baga (2). !!! Nos
que n’ens un cèrtin âjo n’en prês
cognessence que tot l’at un prix.... Chèrcens
de fére aprende a noutres jouenos que se
hué possont (3) dére et fére cen que vôliont,
dedens des limites, l’est per lo prix que l’ant payâ
cels (4) maquis(ârds)... L’histouèra ètudiyâye a l’écoula
l’at fét-nos crêre que cetes gents l’érant tués des
rojos de comunistes, l’est pas veré !!!! La luta
contre lo nazifascisme l’ére des pèrsones
corajoses, des pèrsones que l’ayavont (5) lo
corâjo de agouétiér (6) plles luen de la pôrta du
micho (7), des pèrsones que l’ant avê (8) lo corâjo
de pas sè lessiér soumètre... A cetes pèrsones
sè pôssont (9) pas balyér de color, serêt limitatif.
Cetes pèrsones avouéc lo côr en man, lo
fusily dessus l’épâla (10) l’ant quitâ lor famelye,
leur travaly per quârque chousa de ples grôs de ples
important. Cetes pèrsones, ou ben quasi
totes, a la fin sont retiriâ-se (11) en chiéz lor
sens(a) prètende ren... Per cetes pèrsones mè
sentésso (12) de hurlér vive la rèsistance ...et fôra
les nazistes..... et jamés plles le fascisme. !!!!....

1 adrét, franc (‘carrément’)
2 chousa
3 pôvont
4 celos
5 aviévont
6 regardar
7 de la méson
8 yu
9 pôvont
10 l’èchièbla
11 sè sont retiriâ
12 sentirê